Լալունցի գլխավոր առավելություններից մեկը կայանում է նրանում, որ Լալունցը ունի իր սեփական հեքիաթային կերպարները։ Նրանցից յուրաքանչյուրը առանձնանում է իր բնավորությամբ, խառնվածքով և շատ սիրված է մեր փոքրիկ հաճախորդների կողմից։

Մեր բոլոր կերպարները ապրում են Քարահունջում։

Եկեք ծանոթանանք նրանց հետ։

Եղնիկ Լալուն մեր ամենաբարի, ամենափխրուն, ամենաընկերասեր և ամենախելացի կերպարն է։ Չնայած նա դեռ շատ փոքր է և չի գնում դպրոց, բայց արդեն կարողանում է կարդալ և գրել։ Լալուն սիրում է խաղալ, երգել, պարել և հեքիաթներ պատմել:

Լալուի լավագույն ընկերներից մեկը Կայծակ կրիան է։ Դուք, իհարկե գիտեք, որ կրիաները շատ դանդաղաշարժ են։ Երբ ծնվեց մեր կրիան, նրա մայրիկը որոշեց մի փոքր երկար մտածել անուն ընտրելիս։ Ու պատկերացնու՞մ եք՝ նա դեռ անուն է ընտրում։ Բայց մեր կրիայի ընկերները չթողեցին նրան առանց անուն և կատակով անվանեցին նրան Կայծակ, քանի որ նա բոլոր կրիաներից ամենաարագաշարժն է։

           Մեր արագիլ Ֆրանկլինը իրեն համարում է կիսաֆրանսիացի: Իսկ գիտե՞ք ինչու: Դեռ որդու ծնունդից առաջ Ֆրանկլինի մայրը երազում էր Ֆրանսիա թռչել: Նա այնքա՜ն էր երազում թռչել Էյֆելյան աշտարակի շուրջը, որ ի վերջո որոշում է իր որդու անունը Ֆրանկլին դնել, որպեսզի իրեն Ֆրանսիային ավելի մոտ զգա։ Ֆրանկլինը հիանալի խոսում է ֆրանսերեն և շատ է սիրում ճամփորդել։

Ոզնիներ Լալան և Լելեն քույր և եղբայր են։ Չնայած որ ամբողջ օրը նրանք վիճում են, միևնույն է, անչա՜փ շատ են սիրում իրար և միշտ միասին են։ Լելեն հրաշալի է նվագում, իսկ Լալան այնքա՜ն լավ է երգում, որ ընկերները ամեն օր խնդրում են նրան երգել։

Քարահունջի ամենափոքրիկ բնակիչը Արշալույսիկն է։Արշալույսիկն անչա՜փ բարի է։ Մի անգամ նա իմացավ, որ իր ընկերները առավոտյան չեն կարողանում ժամանակին զարթնել և միշտ ուշանում են իրենց գործերից։ Այդ օրվանից սկսած ամեն առավոտ Արշալույսիկը շրջում է Հայոց բնաշխարհով մեկ և իր զվարթ ծլծվոցով արթնացնում իր սիրելի ընկերներին։

Գոշ արջուկը Քարահունջ է ժամանել Տավուշի մարզից։ Նա շատ է սիրում ճամփորդել և այնքան սիրեց Ուխտասարն ու Զորաց Քարերը և այնպես մտերմացավ այստեղի բնակիչների հետ, որ այլևս ետ չգնաց։ Գոշը շա՜տ է սիրում գրքեր կարդալ, Մխիթար Գոշի պես առակներ է հորինում և բանաստեղծություններ գրում։

Բայց Գոշ արջուկը մենակ չէր ճամփորդում և Քաարահունջ էր ժամանել փոքրիկ սիրունիկ Փամփլիկ նաապսատակի հետ։

Եվ մեր հեքիաթային աշխարհի թերևս ամենաչարաճճի կերապարը՝ մողես Մողին։ Մողին ի սկզբանե Քարահունջ էր եկել բացահայտելու Քարահունջի գաղտնիքները և ընկերացել էր այստեղի բնակիչների հետ՝ իր շահադիտական նպատակներին հասնելու համար։ Սակայն մեր բարի և ընկերասեր կերպարների շնորհիվ նա կարողացավ հասկանալ իր սխալները և դարձավ նրանց ամենալավ և սիրելի ըներներից մեկը։

Լալունցի հեքիաթային աշխարհի դեռևս միակ մարդկային կերպարը՝ մեր գեղեցկուհի փոքրիկ հայուհին է։ Այս փոքրիկ աղջնակը նոր է հայտնվել Քարահունջում, բայց իր գեղեցկության, բարության և հոգատարության շնորհիվ անչափ սիրվել է կենդանական աշխարհի ներկայացուցիչների կողմից։

Նա շատ խելացի, գրքասեր և շնորհալի աղջնակ է։ Շատ սիրում է ծաղիկներ, հատկապես՝ յասամաններ։ Մեր կերպարներին անվերջ հետաքրքիր պատմություններ է պատմում և նրանց համար զվարճալի խաղեր հորինում։

Դե ինչ, դու էլ սիրեցիր չէ՞ մեր բոլոր հերոսներին։ Դե ուրեմն, մենք արդեն ընկերներ ենք։