Ինչպես սովորեցնել  երեխային գիրք կարդալ

Ինչպես սովորեցնել երեխային գիրք կարդալ

2023-02-16

Հաճախ բողոքելով երեխայի վարքից կամ պահվածքից՝ մենք մոռանում ենք, որ երեխաները ընդօրինակում են ծնողների վարվելակերպը և սովորությունները։ Վերջին ժամանակահատվածում ծնողներին առավել շատ անհանգստացնում է այն փաստը, որ իրենց երեխաները սկսել են քիչ գիրք կարդալ։ Իսկ հարցրե՞լ է ծնողը ինքն իրեն քանի անգամ է երեխան տեսել իրեն գիրք կարդալիս, չէ՞ որ մեր երեխաները կրկնօրինակում են այն, ինչ տեսնում են։

Մենք բոլորս էլ մեր գերհագեցած առօրյայում միևնույն է ժամանակ պետք է գտնենք երեխաների հետ ժամանց կազմակերպելու համար։ Եվ այդպիսի ժամանցներից մեկն էլ կարող է համատեղ ընթերացանությունը լինել։

           Իհարկե, նախադպրոցական տարիքի երեխաները չեն կարող կարդալ, և ծնողները պետք է ժամանակ գտնեն երեխաների համար գրքեր կարդալու և կարդացածը մեկնաբանելու համար։ Պարբերաբար լսելով մայրիկի կամ հայրիկի կողմից ընթերցվող հետաքրքիր պատմությունները՝ երեխաները հետագայում իրենք էլ կսկսեն հետաքրքրություն ցուցաբերել գրքի նկատմամբ:

Իսկ արդեն ավելի բարձր տարիքի դպրոցական երեխաների հետ միասին ծնողները կարող են որոշակի ժամ որոշել և միասին գիրք կարդալ՝ յուրաքանչյուրն իր նախընտրած ժանրում։

Իսկ ի՞նչ կարդալ երեխաների համար, ինչպե՞ս կազմակերպել ընթերցանությունը։

  •  Երեխաների համար կարելի է բանաստեղծություններ, պատմվածքներ, հեքիաթներ, պոեմներ կարդալ և այն ամենը, ինչը, կարծում եք, կհետաքրքրի ձեր փոքրիկին:
  •  Երեխայի մեջ հետաքրքրություն առաջացնելու համար միասին գրադարան կամ գրախանութ այցելեք և վերցրե՛ք նրա ընտրած գիրքը:
  •  Մի՛ վախեցեք նրա համար «մեծական» գիրք գնելուց, նա մի օր անպայման կկարդա դրանք:
  •  Այնպիսի գրքեր կարդացե՛ք, որտեղ պատմում են, թե ինչպես են առաջացել այս կամ այն բնության երևույթները, կենդանիները, տիեզերքը։
  •  Եթե ձեր երեխան շատ հարցեր է տալիս, հետաքրքրասեր է, նրա համար գնեք գունազարդ հանրագիտարաններ։
  •  Նախքան ընթերցանությունը սկսելը և երեխայի, և Ձեր համար ստեղծեք հարմարավետ միջավայր։
  • Կենդանիների կամ հեքիաթների բացասական հերոսների խոսքը կարդալիս զգույշ եղեք, որպեսզի չվախեցնեք երեխային: Պետք չէ, օրինակ` գայլի խոսքը սարսափ առաջացնող ձայնով կարդալ: Դա կարող է վախեցնել երեխային։
  •  Ընթերցելիս կարող եք ընթացքում հարցեր տալ երեխային այն մասին, թե նա ինչպես է պատկերացնում պատմության շարունակությունը:
  •  Ավարտից հետո միասին քննարկեք հերոսների գործողությունները, դա երեխային կօգնի ուրիշի օրինակով սովորել, հասկանալ, թե ինչ կարելի է անել և ինչը` ոչ:
  •  Խուսափե՛ք նաև նրա վրա օրինակներ բերելուց, մի՛ ասեք, որ այսինչ բանը չանելու դեպքում նա էլ կպատժվի և այլն… Դա երեխային բարդութավորում է, վախեր առաջացնում նրա մեջ:
  • Գրքեր կարդալիս երեխաներին վերաբերվեք  ինչպես մեծերի: Նրանք իրականում ամեն բան շատ լավ են հասկանում, գիտեն, որ բարին անպայման հաղթում է չարին:

  Տեխնոլոգիապես հագեցած այս դարաշրջանում եկեք վաղ հասակից սովորեցնենք մեր երեխաներին սիրել գիրքը և դարձնենք գիրքը նրա ամենամտերիմ և հավատարիմ ընկերը։