«Աննա Աստվածատուրյան» հիմնադրամը նախաձեռնել է ևս մեկ հայրենանվեր ծրագիր՝ «Սեր Արցախ» բարեգործական նախագիծը, որի շրջանակում Արցախում ծնված յուրաքանչյուր փոքրիկ ստանալու է իր առաջին նվեր-տուփը: Այս ծրագրի խորհուրդն է արժևորել պատմական հողի վրա ընտանիքներ կազմելու և երեխաների ապագան այստեղ կերտելու դերն ու կարևորությունը:

Նախագիծը մեկնարկելու է հունիսի 1-ին` Երեխաների պաշտպանության միջազգային օրը` ի նշան 2020 թվականի Արցախյան 44-օրյա պատերազմից հետո ծնված և իրենց հայրենի հողին նոր կյանք տվող երեխաներին պաշտպանելու անհրաժեշտության և պատասխանատվության։

Նվեր-տուփերում ներառված բոլոր պարագաները բարձրորակ հայկական արտադրանք են և ձեռք են բերվում Հայաստանում ու Արցախում: Յուրաքանչյուր տուփ ներառում է գիշերանոց, քնապարկ, սրբիչներ, վերմակ, խնամքի հիմնական պարագաներ (անձեռոցիկներ, մանկական շամպուն, ջերմաչափ և ծծակ), ծննդկանի համար նախատեսված հիգիենայի պարագաներ, ինչպես նաև Հայաստանում անհատական պատվերով պատրաստված փափուկ մանկական գրքեր և փայտե անիվներով խաղալիքներ:

Lalunz-ը մեծ պատրաստակամությամբ միացել է այս ծրագրին՝ ցանկանալով ունենալ իր լուման այս հայրենանվեր գործում։

Նվեր-տուփում առկա ամենափոքրիկենրի համար նախատեսված բոլոր հագուստատեսակները սիրով և խնամքով պատրաստված են հենց Lalunz-ի կողմից՝ ամենաորակյալ կտորներից և աքսեսուարներից։

«Սեր Արցախ» բարեգործական ծրագիրը հնարավորություն է ընձեռում սփյուռքահայերին, Հայաստանի բնակիչներին, ձեռնարկություններին և այլ նվիրատուներին` հովանավորելու Արցախում բնակվող ընտանիքներին ուղարկվող մեկ կամ մի քանի տուփերի ստեղծումը: