only girls

LALUNZ-Ի ՈՒՐԱԽ ԵՎ ԸՆԿԵՐԱՍԵՐ ԿԵՐՊԱՐՆԵՐԸ

admin 2019-07-25

Մեր բոլոր կերպարները ապրում են Քարահունջում։ Նրանք մեր լավագույն բարեկամներն են։ Վստահ ենք, որ երբ ծանոթանանք նրանց հետ, դու էլ կդառնաս նրանց ընկերը ու բոլորս միասին կսկսենք նոր ու արկածային մե՜ծ ճանապարհորդություն։ 

Դե ինչ, արի սկսենք ամենաբարի, ամենափխրուն, ամենաընկերասեր և ամենախելացի մեր ընկերոջից` եղնիկ Լալուից:

Չնայած, որ մեր Լալուն դեռ շատ փոքր է և չի գնում դպրոց, նա արդեն կարողանում է կարդալ և գրել, քանի որ իսկապես ցանկանում է գտնել շատ ընկերներ: Լալուն սիրում է խաղալ, երգել, պարել և հեքիաթներ պատմել: Մեր եղնիկը Քարահունջից է: Լալուն այնքան շատ է արկածների մեջ հայտնվում, որ որոշել է իր ու իր ընկերների մասին մի գիրք գրել ու պատմել իրենց արկածները բոլոր - բոլորին։ 

Լալուի լավագույն ընկերներից մեկը Ֆենեկա աղվեսն է:

Ֆենեկան մեզ մոտ է եկել հեռավոր Եգիպտոսից: Երկար ժամանակ նա մոլորված էր Քեոփսի բուրգերի մեջ: Եվ Դուք գիտեք, թե ինչպե՞ս նա կարողացավ դուրս գալ այնտեղից: Որովհետև նա շատ խելացի է, շատ է կարդում և ուսումնասիրում է հիերոգլիֆները: Մեր աղվեսը պատկանում է Ֆենեկաների հին տոհմին: Ֆենեկան աշխարհի ամենաընկերասեր աղվեսն է։ Նա միշտ իր ընկերների կողքին է, երբ իր կարիքը կա ու միշտ առաջինն է զգում վտանգը։

Եկեք ծանոթանանք մեր հաջորդ կերպարի՝ կրիաի հետ։ 

Դուք, իհարկե գիտեք, որ կրիաները շատ դանդաղաշարժ են։ Երբ ծնվեց մեր կրիան, նրա մայրիկը որոշեց մի փոքր երկար մտածել անուն ընտրելիս։ Ու պատկերացնու՞մ եք՝ նա դեռ անուն է ընտրում։ Բայց մեր կրիաի ընկերները չթողեցին նրան առանց անուն և կատակով անվանեցին նրան Կայծակ, քանի որ նա բոլոր կրիաներից ամենաարագաշարժն է։ Այո, այո։ Անհավանական կարող է թվալ, բայց մեր Կայծակը վազքի առաջնության է մասնակցել ու գրավել է պատվավոր 3-րդ հորիզոնականը։ Իհարկե մրցույթի մասնակիցները չորսն էին, բայց նա շատ հպարտ է, որովհետև մրցույթում հաղթել է Լիկա նապաստակին։ 

Արագիլ Ֆրանկլինը։

Մեր արագիլը իրեն համարում է կիսաֆրանսիացի: Իսկ գիտե՞ք ինչու: Դեռ որդու ծնունդից առաջ Ֆրանկլինի մայրը երազում էր Ֆրանսիա թռչել: Նա այնքա՜ն էր երազում թռչել Էյֆելյան աշտարակի շուրջը, որ ի վերջո որոշում է իր որդու անունը Ֆրանկլին դնել, որպեսզի իրեն Ֆրանսիային ավելի մոտ զգա։ Ընկերներացեք մեր Ֆրանկլինի հետ, և նա կսովորեցնի Ձեզ ֆրանսերեն խոսել, կպատմի Ձեզ շատ հետաքրքիր պատմություններ տարբեր երկրների եւ վայրերի մասին:

Հիմա պատմենք մեր ոզնիների մասին։ Դե՜ ինչպես կարելի է հասկանալ առաջին իսկ հայացքից, Լալան և Լելեն քույր և եղբայր են։

Չնայած որ ամբողջ օրը նրանք վիճում են, միևնույն է, անչա՜փ շատ են սիրում իրար և միշտ միասին են։ Լելեն հրաշալի է նվագում, իսկ այ Լալան այնքա՜ն լավ է երգում, որ ընկերները ամեն օր խնդրում են նրանց երգել։ 

Հիմա բոլորն են պատմում, թե որքան լավ երաժիշտներ են նրանք, բայց այ պարոն Փնթնփնթանը՝ հարևան բեզուարյան այծը, ամբողջ օրը բողոքում է նրանց գիշերային փորձերից և աղմուկից, ինչի պատճառով նա չի կարողանում գոնե մի փոքր հանգստանալ։ Այնպես որ եթե հանկարծ հանդիպես պարոն Փնթփնթանին, հանկարծ չասես, որ Լալայի ու Լելեի ընկերն ես, այլապես ստիպված կլինես երկա՜ր բողոքներ լսել։ Լալան ու Լելեն շա՜տ ուրախ են անցկացնում իրենց օրը։ Նրանք նվագում, երգում, պարում ու խաղում են ամբողջ օրը։ Ի դեպ, մոռացանք նշել․ կա 2 բան, որ նրանց հետ անել պարզապես հնարավոր չէ։ Դե՜ առաջինը նրանց գրկելն է, իսկ երկրորդը փուչիկ խաղալը:

Դե ի՞նչ, սիրեցի՞ր մեր հերոներին։ Ուրեմն դարձիր նրանց ընկերը, միացիր մեր ուրախ և ընկերասեր թիմին։ Մենք սպաւմ ենք քեզ։

Հետևե՛ք մեզ

Հետևե՛ք մեզ նաև սոց․ ցանցերում

social icon social icon