ՖՐԱՆԿԼԻՆԻ «ՊԱՅԹՈՒՑԻԿ» ՔԻՄԻԱԿԱՆ ՓՈՐՁԸ

ՖՐԱՆԿԼԻՆԻ «ՊԱՅԹՈՒՑԻԿ» ՔԻՄԻԱԿԱՆ ՓՈՐՁԸ

2020-07-25

Սիրելի փոքրիկներ, դուք հավանաբար արդեն գիտեք, որ անտառում ապրող բոլոր կենդանիներն ունեն իրենց «մասնագիտությունները»: Օրինակ Լալու եղնիկը ամենաիմաստունն է և միշտ խելացի խորհուրդներ է տալիս անտառի բոլոր կենդանիներին՝ նրանց հավաքելով իր շուրջ: Կայծակ կրիան սպորտային մարզիչ է: Արշալույսիկը զբաղվում է անտառային կյանքի կարգուկանոնի պահպանմամբ՝ ժամանակին հիշեցնելով բոլորին իրենց գործերի մասին: Դե իսկ ոզնիներ Լալան ու Լելեն ամենահայտնին են անտառում. նրանք միասին նվագում ու երգում են՝ ուրախություն պարգևելով անտառի բնակիչներին: Անտառի բնակիչներից մեկն էլ՝ Ֆրանկլին արագիլը, ինչպես գիտեք, անսահման մեծ սեր ունի Ֆրանսիայի հանդեպ, ուստի նա դարձել է ֆրանսերենի մասնագետ և սովորեցնում է բոլոր ցանկացողներին: 

Մի օր սակայն Ֆրանկլին արագիլի մտքով անցավ զբաղվել որևէ երկրորդ գործով և նա որոշեց քիմիական փորձարկումներ անել լաբորատորիայում: Բոլորը, ովքեր լսում էին այդ մասին, պնդում էին, որ դա լավ միտք չէ: Ֆրանկլինը լավ չէր տիրապետում քիմիայի, և բոլորը վստահ էին, որ այդ գաղափարը լավ ավարտ չի ունենալու: Սակայն Ֆրանկլինը չլսեց իր ընկերներից ոչ մեկին և վերջիվերջո իրագործեց իր մտածածը: Սկզբում ամեն ինչ լավ էր, Ֆրանկլինը կատարում էր ամենապարզ փորձարկումները, և դրանք հաջող էին ընթանում: Սակայն աստիճանաբար նա սկսեց ավելի ու ավելի բարդ քիմիական փորձեր անել և վերջապես խճճվեց բազմաթիվ քիմիական տարրերի և բանաձևերի խառնաշփոթում: Հանկարծ անտառը ցնցվեց հնչեղ պայթյունից: Բոլորը վախեցած վազեցին լաբորատորիա ու ինչ… Այնտեղ կանգնած էր Ֆրանկլին արագիլը՝ ձեռքին կոտրված անոթ, իսկ գլխին պայթյունից սևացած մեկ-երկու մազիկ: Ֆրանկլինի ընկերները, տեսնելով նրան ողջ-առողջ, հանգիստ շունչ քաշեցին, սակայն նրա «նոր սանրվածքը» բոլորին անչափ ծիծաղեցրեց: Ֆրանկլինն ամաչելով խոստացավ ինքն իրեն ու բոլորին, որ այսուհետ ոչ մի բան չի անի կյանքում առանց լավ ուսումնասիրելու և պատկերացում կազմելու:Հետագայում Ֆրանկլինը հայտնի դարձավ իր հաջողված բարդ քիմիական փորձերով, բայց նրա ծիծաղաշարժ սանրվածքը ամեն անգամ հիշեցնում էր պայթյունի մասին: